पुस ४ बारा । झापाको काँकडभिट्टा बाट होडेको बस बारामा दुर्घटना हुँदा ३ जनाको मृत्यु भएको छ । काकडभिट्टाबाट काठमाण्डौका लागि छुटेको बा ३–००१ ख २५८७ नम्बरको बस र हेटौँडाबाट पथलैयाका लागि छुटेको ना ७ ख ७३०० नम्बरको ट्रक बिहान २ बजे तिर बाराको अमलेखगञ्जमा एक आपसमा ठोक्किएर दुर्घटना भएको प्रहरीले जनाएको छ ।
ज्यान गुमाउनेहरुमा ट्रक चालक तनहुँ घर भएका २८ वर्षका ट्रक चालक पूर्ण गुरुङ, बस चालक मकवानपुर हेटौँडाका ४० वर्षका हरिशमशेर सुयाल थापा र अर्का सनाखत हुन नसकेका पुरुष रहेका जिल्ला प्रहरी कार्यालय बाराका प्रवक्ता एवम् प्रहरी नायब उपरीक्षक दधिराम न्यौपानेले जानकारी दिएका छन् ।
दुर्घटनामा परी अन्य २७ जना घाइते भएका छन् । घाइतेमध्ये गम्भीर अवस्थाका सात जनालाई हेटाैँडा तथा चितवन मेडिकल कलेज पठाइएको र सामान्य घाइते भएका २० जनाको स्थानीय अस्पतालहरुमा उपचार भइरहेको प्रहरीले जनाएको छ ।