अंग्रेजी नयाँ वर्ष २०२१ लाई स्वागत गरिरहेका बेला धरानको पर्यटकीक्षेत्र बगरकोटको सडकलाई पनि अम्ब्रेला स्ट्रिट बनाइएको छ। धरान १५ स्थित बगरकोट प्रमुख पर्यटकीय गन्तव्यमा पर्छ। लकडाउनले लामो समय थला परेको बगरकोटलाई अंग्रेजी नयाँ वर्षको स्वागतको लागि बिशेषरुपमा सजाइएको हो।
काठमाडौंलगायत विभिन्न स्थानमा छाता झुण्ड्याएर पर्यटकहरुलाई आकर्षित गरेको खबर फैलिएपछि धरानको बगरकोटमा पनि रंगीचंगी छाता झुण्ड्याइएको बगरकोट व्यवसायी मञ्चले जनाएको छ।
तीन दिनदेखि मञ्चले ५ सय वटा छाता झुण्ड्याएको हो। छातामा ८० देखि ९० हजार खर्च भएको छ। उक्त खर्च स्थानीय व्यवसायीहरु र गोर्खा ब्रुअरीको सहयोगमा राखिएको पनि मञ्चका अध्यक्ष जिवन लिम्बुले बताए।
बगरकोटमा पाँच वटा लाउञ्ज एण्ड बारहरुसहित ३२ वटा रेष्टुरेन्ट, सेकुवा कर्नर, डिपार्टमेन्ट स्टोर, किराना पसललगायत छन्। बगरकोट सेकुवा, कान र जिब्रोको लागि प्रख्यात ठाउँ हो। यहाँ हरेक साँझ आन्तरिक पर्यटकहरुको घुँइचो लाग्ने गर्छ।
नागरिकन्युज डटकमबाट