कार्तिक २७, झापा । आज बिहान झापा गाउँपालिका-६ हनुमान चौकपूर्व राजन मण्डलको घरमा आगलागी भएको छ । बिहान ४ः४५ बजे बिद्युतद्वारा आगलागी भएको हो । घटनामा अन्न , लताकपडा, कागजपत्रलगायत सम्पूर्ण सामान पूर्ण रुपले जलेर नष्ट भएको छ ।
त्यसैगरी हिजो राती मोरङको उर्लाबारी–७ बरगाछीस्थित दीपक कार्कीको घरमा भएको आगलागीमा परी ४ प्रहरी र २४ जना सर्वसाधारणसहित २८ जना घाइते भएका छन् । प्रहरीतर्फ एकजना असई, एक जना हबल्दार र दुई जना जवान घाइते भएको कुरा प्रहरीले जनाएको छ । घाइतेहरुको बीएण्डसी, विराट नर्सिङ होम, आर्या, रेडप्लस, लाइफलाइन लगायतका अस्पतालमा उपचार भइरहेको छ ।
जिल्ला प्रहरी कार्यालय मोरङका डिएसपी रञ्जन दाहालका अनुसार स्थानीय दीपक कार्कीको घरमा आगो लागेपछि ग्यास सिलिण्डर विष्फोट भएको थियो । त्यसबाट बाटोमा हिँडिरहेकाहरु समेत घाइते भएको दाहालले बताए । ‘घाइतेहरुमध्ये कसै–कसैको ५० प्रतिशतसम्म शरीर जलेको छ,’ दाहालले भने ।