रहेनन् भारतका पुर्वराष्ट्रपति प्रणव मुखर्जी

भारतका पूर्वराष्ट्रपति प्रणव मुखर्जीको निधन भएको छ।
सोमबार उनको नयाँ दिल्लीस्थित आरआर सैनिक अस्पतालमा निधन भएको कुरा उनको परिवारिक श्रोतले पुष्टि गरेको छ । कोरोना संक्रमण भएर उपचाररत ८४ बर्षिय मुखर्जी केही दिनदेखि कोमामा थिए।
‘भारी मनका साथ यो जानकारी गराउदैँछु, आरआर अस्पतालका डाक्टरको सक्दो प्रयास र भारतभरका मानिसहरूको प्रार्थनाका बावजुद् हाम्रा बुबा प्रणव मुखर्जी अहिले भर्खरै बित्नुभएको छ,’ उनका छोरा अभिजितले ट्वीटरमा लेखेका छन् ।
भारत रत्नबाट विभुषित मुखर्जी सन् २०१२ देखि २०१७ भारतका राष्ट्रपति बनेका थिए। मनमोहन सिंह प्रधानमन्त्री हुँदा उनी अर्थमन्त्री थिए।
गत अगस्ट १० मा उनलाई कोरोनाभाइरसको संक्रमण पुष्टि भएको थियो।