माघ १९ झापा । लकडाउन हटेसंगै झापामा लागुऔषध प्रयोगकर्ताहरुको संख्यामा बृद्धि हुदै गएको तथ्यांक बाहिर आएकोछ ।
ह्यापी नेपाल दमकले शाखा कार्यालय भद्रपुरमा गरेको सरोकारवाला हरुसंगको छलफलमा १३ प्रतिशतले प्रयोगकर्ताहरुको संख्यामा बृद्धि हुँदै गएको जनाईएको हो । सो संस्थाद्वारा आयोजित छलफलमा सन् २०२० मा गरिएका गतिविधिका बारेमा जानकारी गराउँदै कार्यक्रम संयोजक चन्द्रप्रसाद पौडेलले लकडाउन हटेसंगै खुला सीमाका कारण जिल्लामा प्रयोगकर्ताहरुको संख्यामा बृद्धि हुँदै गएको बताए । उनले पछिल्लो समयमा ह्यापी नेपालले दैनिक ५५ देखि ६० जनासम्मका प्रयोगकर्तालाई परामर्श सेवा प्रदान गर्दै आएको उल्लेख गर्दै ह्यापी नेपाल शाखाले मात्र सन् २०२० मा ५ सय १ जना प्रयोगकर्तालाई सेवा प्रवाह गरिसकेको जानकारी दिए ।
कार्यक्रममा बोल्दै ओएस टी एशोसिएशन टीम अध्यक्ष ईन्द्रप्रसाद ओलीले झापा जिल्ला लागु औषध प्रयोगकर्ताहरुको जोखिममा रहेको बताउँदै १९ देखि ५५ बर्षसम्मका प्रयोगकर्ताहरुको संख्या झापामा हालसम्म ११ हजार माथि पुगिसकेको बताए ।
कार्यक्रमका प्रमुख अतिथि रहेका भद्रपुर नगरपालिकाका प्रमुख जीवनकुमार श्रेष्ठले ह्यापी नेपालको सहकार्यमा आगामी दिनहरुमा नगरपालिकाले प्रयोगकर्ता न्यूनीकरणका लागि निश्चित कानुन बनाएर लाग्ने बताए ।
वडा प्रहरी कार्यालय भद्रपुरका प्रमुख डम्बरबहादुर गिरीले प्रयोगकर्ता कम गर्न प्रचारप्रसारसहितको चेतना जगाउनु पर्नेमा जोड दिए । संस्थाका कार्यकारी निर्देशक कुमार गुरुङ्गको अध्यक्षतामा सम्पन्न छलफलको संचालन जीवन नेपालीले गरेका थिए ।
झापामा विभिन्न २० वटा संस्थाहरुले लागु औषध दुव्र्यसन नियन्त्रणको क्षेत्रमा क्रियाशील भएर काम गर्ने गरेका छन् ।
ह्यापी नेपाल शाखाबाट मात्र प्रत्येक ३–३ महिनाको अन्तरालमा ५ सय ४० जना बराबरले सेवा लिने गरेका छन् । छलफल कार्यक्रममा सरोकारवालाहरुको उल्लेखनीय मात्रामा सहभागिता रहेको थियो ।
Loading ...
